Sali Berisha akuzoi sot Edi Ramën se është iniciatori i konceptit “prindi 1” dhe “prindi 2”. Sipas tij, edhe deklaratat e fundit të kryeministrit për gratë dhe burrat janë zgjatim i kësaj politike sorosiane. Në një takim me fermerët në Elbasan, kreu demokrat theksoi ndër të tjera se është detyrë e demokratëve ta shpërndajnë programin në çdo derë shqiptari.
Ndërsa Edi Rama sërish kërkoi mbështetjen e demokratëve për pasaportën europiane. “Duke na votuar ne,” tha ai, “kanë mundësinë të rregullojnë dhe partinë e tyre. Demokratëve u them: e di që shumë prej jush nuk e votoni dot PS-në, por nëse nuk shkoni dot te numri 5, zbrisni më poshtë dhe votoni djemtë dhe vajzat e reja.”
“Unë nuk shaj burrat, por bëj pjesë tek ata burra që e dinë shumë mirë se forca e grave dhe e vajzave është e pamohueshme, dhe nëse nuk ke në krah gratë dhe vajzat, je gjysmak dhe çyrk,” tha kryeministri në një takim elektoral në zonën e Kamzës në kryeqytet.
