Sali Berisha premtoi sot se do t’u kthejë paratë qytetarëve shqiptarë. Në një takim në Dibër, kryetari i PD u tha të pranishmëve në takim se tashmë ai nuk ka më asnjë ambicie për pushtet apo për luks, por thjesht për t’u rikthyer dinjitetin shqiptarëve. Me premtimin e ngjashëm me atë të kthimit të parave që shqiptarët lanë në firmat piramidale, Sali Berisha tha se në qeverisjen e tij do të rriten rrogat dhe mirëqenia, duke kujtuar qeverisjen e tij 2005-2013.
Para dibranëve, Sali Berisha përmendi dhe një herë vlerat e familjes tradicionale, duke risjellë premtimin e PD-së se në qeverisjen e tij nuk do të ketë kurrë prind 1 dhe prind 2 dhe kjo do jetë e sanksionuar në ligj.
Në fund, ai i dha përgjigje dhe Edi Ramës, që mburret me Rrugën e Arbrit, duke i kujtuar se nuk ka ndërtuar ende Rrugën e Lurës.
“Në Dibër ti erdhe me gjuhën e pushtuesit dhe kopukut. Burrat e Dibrës janë si malet e Dibrës, mjerë ai që i sulmon,” tha Berisha duke iu përgjigjur kështu deklaratave të Ramës nga ky qytet.
