Kryetari i Partisë Demokratike, Sali Berisha, gjatë vizitës për Pashkë në Kishën Ortodokse, nuk e la pas dore fushatën elektorale. Në mesazhin e tij për mediat, Berisha foli për ringjalljen e Krishtit dhe bëri një krahasim paksa të çuditshëm duke theksuar se edhe opozitën shqiptare janë përpjekur ta shkatërrojnë, por ajo është ringjallur dhe është më e fuqishme se kurrë.
“Kështu që, në një mënyrë, historia e tyre është historia e ringjalljes. Pra, është dëshmi e pavdekësisë. Në fakt, kjo ka një analogji edhe me opozitën shqiptare. U përpoqën ta fshijnë nga faqja e dheut, por u ringjall. Sot është më e fuqishme se kurrë, për të përzënë antikrishtin nga trojet shqiptare,” deklaroi Berisha.
Në të njëjtën kohë, përpara priftit të Kishës Ortodokse të Kavajës, i cili u vetëdeklarua si përfaqësues i komunitetit arumun në Shqipëri, Berisha u shpreh se shqiptarët duhet të jenë mirënjohës këtij komuniteti. Ai theksoi se ishte pikërisht komuniteti arumun që i mbushi mendjen Ismail Qemalit për të shpallur pavarësinë e Shqipërisë në vitin 1912.
