Edhe pse protestat e fundjavës u shoqëruan me sloganin “Rama në burg, Berisha në burg”, kreu i PD-së Sali Berisha i cilësoi ato si një mobilizim historik të diasporës shqiptare dhe mbështetësve të opozitës.
Në konferencën për mediat, Berisha falënderoi shqiptarët që udhëtuan nga vende të ndryshme për t’iu bashkuar protestës në Tiranë, duke e konsideruar atë si një nga tubimet më të mëdha të zhvilluara ndonjëherë në vend. Ai tha se pjesëmarrja masive e qytetarëve dhe diasporës tregon, sipas tij, humbjen e mbështetjes për qeverinë.
Kreu i PD-së u bëri thirrje demokratëve të vijojnë protestat për largimin e Edi Ramës dhe përsëriti mesazhin që vendi i tyre është vetëm sheshi para kryeministrisë.
Sipas Berishës, protestat do të vazhdojnë deri në dorëheqjen e Ramës.
