Kreu i grupit parlamentar i PD, Gazment Bardhi, ka reaguar pas raportimeve se rreth 40 studentë shqiptarë nga Tirana janë ndaluar për disa orë nga autoritetet e Maqedonisë së Veriut, teksa udhëtonin drejt Shkupit për t’iu bashkuar protestës për mbrojtjen e gjuhës shqipe.
Sipas pretendimeve të studentëve, ata janë mbajtur për më shumë se tetë orë në kufi dhe janë përballur me kontrolle të vazhdueshme, presion dhe trajtim të papranueshëm nga autoritetet maqedonase.
Në një reagim në rrjetet sociale, Bardhi e cilësoi ngjarjen si “trajtim çnjerëzor” dhe dënoi ndalimin e të rinjve shqiptarë, shumica e të cilëve, sipas tij, ishin të moshës 18-20 vjeç.
“Është skandaloze që studentë shqiptarë, shumica 18-20 vjeç dhe shumë prej tyre vajza, të trajtohen si kriminelë vetëm sepse po udhëtonin për të mbështetur protestat në mbrojtje të gjuhës shqipe dhe identitetit kombëtar të shqiptarëve në Maqedoninë e Veriut”, shprehet Bardhi.
Deputeti demokrat kritikoi gjithashtu mungesën e reagimit nga institucionet shqiptare, duke akuzuar qeverinë dhe Ministrinë për Evropën dhe Punët e Jashtme për heshtje ndaj situatës.
Sipas Bardhit, të rinjtë shqiptarë janë mbajtur për afro nëntë orë pa akuzë dhe pa shpjegime nga autoritetet maqedonase, ndërsa pretendoi se ata janë lëvizur nga kufiri me Shqipërinë drejt Kumanovës dhe më pas pranë kufirit me Serbinë.
“Kjo nuk është diplomaci. Është kapitullim dhe braktisje e turpshme e qytetarëve shqiptarë”, deklaroi Bardhi në reagimin e tij.
