Anëtari i Kryesisë së Partisë Demokratike, Ervin Salianji, i ka drejtuar një letër Presidentit të Partisë Popullore Europiane (PPE), z. Manfred Weber, si dhe drejtuesve të partive kryesore të qendrës së djathtë europiane, pjesë e PPE-së, përfshirë Kancelarin gjerman Friedrich Merz dhe Kryeministrin grek Kyriakos Mitsotakis, ku shpreh shqetësimin për zhvillimet e fundit në Partinë Demokratike të Shqipërisë dhe, sipas tij, cenimin e standardeve demokratike në funksionimin e saj.
Në letrën drejtuar partnerëve europianë, Salianji ngre shqetësime lidhur me procesin për zgjedhjen e kryetarit të Partisë Demokratike, duke përmendur mungesë gare, moszbatim të statutit të partisë, përjashtime arbitrare të anëtarëve dhe kandidatëve, si dhe mungesë transparence dhe respektimi të parimeve bazë të pluralizmit politik.
Ai thekson se çështja tejkalon një kandidim individual dhe lidhet me ruajtjen e standardeve demokratike, pluralizmit të brendshëm dhe besueshmërisë institucionale të forcës më të madhe opozitare në vend. Sipas Salianjit, Partia Demokratike, si pjesë e familjes politike europiane, duhet të reflektojë vlerat e demokracisë së brendshme dhe jo praktika përjashtuese apo interesa personale.
Në letër evidentohet gjithashtu se kandidaturat për garën e brendshme janë penguar në mënyrë faktike, zyra përgjegjëse për dorëzimin e dokumentacionit nuk ka funksionuar brenda afateve, ndërsa mbështetës dhe kandidatë janë përjashtuar pa vendime formale dhe pa argumentim statutor. Po ashtu, Salianji pretendon se nuk është respektuar neni i statutit që parashikon dorëheqjen e kryetarit pas humbjes së zgjedhjeve parlamentare.
Në përfundim, ai u kërkon PPE-së dhe drejtuesve të partive të djathta europiane një angazhim parimor dhe konstruktiv për të inkurajuar dialogun, respektimin e normave statutore dhe ruajtjen e standardeve demokratike brenda Partisë Demokratike. Salianji rithekson gjithashtu angazhimin e tij ndaj vlerave europiane, shtetit të së drejtës, pluralizmit dhe integrimit europian të Shqipërisë.
