Tensionet mes Shteteve të Bashkuara dhe Iranit janë rikthyer në nivele të larta, ndërsa armëpushimi i arritur më herët duket se ka marrë fund pas sulmeve të ditëve të fundit.
Presidenti amerikan Donald Trump deklaroi se negociatat me Teheranin vazhdojnë, por pranoi se armëpushimi nuk ekziston më.
“Ne vazhdojmë bisedimet me Teheranin, por armëpushimi ka mbaruar,” u shpreh Trump, duke shtuar se ndihet i kërcënuar nga regjimi iranian.
“Jam në krye të listës së tyre të goditjeve. Shpresoj se do të më ndjeni mungesën. Nëse më vrasin, kam lënë udhëzime specifike,” deklaroi ai.
Ndërkohë, sipas një raporti të Wall Street Journal, Irani ka hartuar një plan të ri për atentat ndaj Trumpit. Vetë presidenti komentoi raportimet duke thënë: “Deri më tani, mendoj se kam qenë pak me fat, por ndoshta ky fat nuk do të zgjasë shumë.”
Në të njëjtën kohë, Irani varrosi në orët e para të së premtes Udhëheqësin Suprem, Ajatollah Ali Khamenei, katër muaj pas vrasjes së tij. Ceremonia në Mashhad, sipas pamjeve të transmetuara nga televizioni shtetëror IRIB, u zhvillua pa praninë e djalit të tij, Mojtaba Khamenei, i konsideruar gjerësisht si pasardhësi i mundshëm.
Në zhvillime të tjera, raportohet se Katari ka bllokuar një plan për konvertimin e një fabrike të Volkswagen në prodhimin e armëve, si pjesë e një marrëveshjeje me Izraelin.
Përshkallëzimi i situatës ka shtuar shqetësimet për një përplasje të re në Lindjen e Mesme, ndërsa përpjekjet diplomatike për uljen e tensioneve mbeten ende pa rezultat.
