Shpejtësia e dobët e internetit nuk vjen gjithmonë nga operatori apo ruteri. Sipas ekspertëve të teknologjisë, edhe objekte të zakonshme në shtëpi, si mikrovala, akuariumi, pasqyrat apo televizorët, mund të dobësojnë ndjeshëm sinjalin e Wi-Fi.
Alex Hills, një nga pionierët e rrjeteve Wi-Fi dhe profesor në Universitetin Carnegie Mellon University, shpjegon se mikrovalët përdorin të njëjtën frekuencë 2.4 GHz që përdoret nga shumë rrjete Wi-Fi. Nëse furra me mikrovalë është e vjetër ose hapet para se të përfundojë ciklin, mund të krijojë ndërhyrje që ngadalësojnë internetin.
Një tjetër “armik” i papritur është akuariumi. Uji thith dhe dobëson valët radio, ndaj një akuarium i vendosur mes ruterit dhe pajisjes suaj mund të krijojë zona pa sinjal. Edhe muret e trasha prej betoni apo tullash e bëjnë më të vështirë përhapjen e sinjalit.
Pasqyrat e mëdha, televizorët dhe sipërfaqet metalike gjithashtu mund të reflektojnë valët e Wi-Fi, duke krijuar pika të dobëta në shtëpi. Ekspertët rekomandojnë vendosjen e ruterit në një pozicion qendror dhe sa më lart, larg pengesave, ndërsa në banesat e mëdha mund të përdoren pajisje Wi-Fi extender ose sisteme mesh, të cilat shpërndajnë sinjalin në të gjithë ambientin.
Edhe moti ekstrem mund të ndikojë në lidhjen me internetin. Reshjet e dendura të borës, temperaturat shumë të ulëta ose të larta mund të dëmtojnë infrastrukturën e rrjetit ose të bllokojnë sinjalet satelitore. Për më tepër, kur shumë persona përdorin njëkohësisht internetin në shtëpi, rrjeti mund të ngadalësohet edhe më shumë.
