Vala intensive e të nxehtit që goditi Gjermaninë në fund të muajit qershor mund të ketë shkaktuar më shumë se 5.400 vdekje të tepërta, sipas të dhënave paraprake të publikuara nga Zyra Federale e Statistikave.
Sipas raportit, gjatë javës së fundit të qershorit u regjistruan 5.486 vdekje më shumë se mesatarja e së njëjtës periudhë për vitet 2022–2025. Kjo periudhë përkoi me kulmin e temperaturave ekstreme, kur në disa rajone të vendit termometri kaloi 41 gradë Celsius.
Ekspertët paralajmërojnë se temperaturat e larta përbëjnë një rrezik të madh për shëndetin, veçanërisht për të moshuarit dhe personat që vuajnë nga sëmundje kronike. Nxehtësia ekstreme mund të përkeqësojë gjendjen e tyre shëndetësore dhe të rrisë ndjeshëm rrezikun e vdekshmërisë.
Gjermania ishte një nga vendet evropiane më të prekura nga vala e të nxehtit, e cila solli temperatura rekord në disa zona të vendit.
Ndërkohë, shkencëtarët theksojnë se ndryshimet klimatike po i bëjnë valët e të nxehtit gjithnjë e më të shpeshta, më të gjata dhe më intensive, duke shtuar rrezikun për shëndetin publik dhe duke ushtruar presion në rritje mbi sistemet shëndetësore.
