Maroku nuk e konsideron më suksesin në futboll si një rastësi. Pas arritjes historike në gjysmëfinalet e Kupës së Botës 2022 dhe me Botërorin e vitit 2030 që do ta organizojë së bashku me Spanjën dhe Portugalinë, vendi ka nisur një projekt afatgjatë për t’u shndërruar në një nga fuqitë e futbollit botëror.
Sipas drejtuesve dhe ekspertëve që kanë punuar në Federatën Mbretërore Marokene të Futbollit (RMFF), gjithçka është rezultat i një strategjie të mirëplanifikuar dhe investimeve të vazhdueshme të mbështetura nga Mbreti Mohammed VI. Në vitet e fundit janë ndërtuar qendra moderne stërvitore, akademia kombëtare, qendra rajonale zhvillimi, stadiume të reja dhe mijëra fusha futbolli për të rinjtë.
Neil Ward, ish-drejtues i Federatës Uellsiane që punoi në Marok nga viti 2020 deri në 2024, thotë se vendi synon të përdorë futbollin edhe si instrument ndikimi ndërkombëtar. “Kur sheh infrastrukturën e ndërtuar, e kupton se këta njerëz janë seriozë dhe duan sukses,” shprehet ai.
Një nga shtyllat kryesore të projektit është aktivizimi i diasporës marokene. Federata ka ngritur një rrjet skautësh në Francë, Holandë, Spanjë, Gjermani, Norvegji, Suedi dhe Danimarkë për të identifikuar që në moshë të vogël futbollistët me origjinë marokene. Aktualisht, 19 nga 26 lojtarët e kombëtares kanë lindur jashtë Marokut, ndërsa shumë prej tyre kishin mundësi të përfaqësonin vende të tjera.
Maroku tentoi të bindte edhe talentin e Barcelonës, Lamine Yamal, i cili ka baba maroken, por sulmuesi zgjodhi të luante për Spanjën. Megjithatë, federata këmbëngul se nuk lë asnjë talent pa ndjekur.
Paralelisht, synimi është që deri në Kupën e Botës 2030 kombëtarja të mbështetet gjithnjë e më shumë te futbollistët e formuar brenda vendit. Për këtë arsye po investohet fuqishëm në akademitë e moshave dhe kampionatet vendase, me objektivin që gjysma e ekipit kombëtar të vijë nga sistemi vendas.
Pas suksesit në Katar, drejtuesit e futbollit maroken besojnë se vendi ka hyrë në një fazë të re zhvillimi. “Pasi merr pak oksigjen nga një sukses i madh, ai fillon të përhapet me shpejtësi në të gjithë vendin,” shprehet ish-drejtori teknik Chris Van Puyvelde, duke iu referuar entuziazmit që ka përfshirë futbollin maroken.
Ndërsa përgatitet të mirëpresë Kupën e Botës 2030, Maroku nuk po ndërton vetëm stadiume, por edhe një sistem të plotë futbolli, me synimin për t’u kthyer në një prej fuqive të qëndrueshme të sportit më popullor në botë.
