Çmimet prestigjioze T3 Awards 2026 kanë shpallur fituesit më të mirë të vitit në teknologji, ndërsa një nga protagonistët kryesorë ka qenë sërish Samsung. Kompania koreano-jugore ka fituar çmimin "Best Phone" me modelin e saj më të ri, Galaxy S26 Ultra, duke përsëritur suksesin e vitit të kaluar.
Paneli i ekspertëve të revistës T3 e vlerësoi Galaxy S26 Ultra si telefonin më të mirë të vitit, duke e renditur përpara rivalëve të tij kryesorë, përfshirë modelet më të fundit Android dhe serinë iPhone 17 të Apple. Pajisja u dallua për performancën e lartë, dizajnin e përmirësuar dhe funksionet e reja të privatësisë, ku spikat ekrani inteligjent që kufizon shikimin e mesazheve dhe e-maileve nga personat përreth.
Përveç çmimit për telefonin më të mirë, Samsung triumfoi edhe në kategorinë e telefonave të palosshëm, ku Galaxy Z Fold 7 u vlerësua si modeli më i mirë i vitit. Ndërkohë, Galaxy Watch 8 Classic fitoi çmimin për orën inteligjente më të mirë.
T3 Awards ndau mbi 80 çmime në kategori të ndryshme. Çmimi "Product of the Year" iu dha atletëve Adidas Adizero Adios Pro Evo 3, ndërsa drejtori ekzekutiv i Apple, Tim Cook, u shpall "Person of the Year".
Në kategoritë e tjera, Dell XPS 14 u zgjodh laptopi më i mirë, BMW iX3 makina elektrike më e mirë, ndërsa Garmin u shpall marka e vitit.
Me rastin e 30-vjetorit të revistës, T3 akordoi edhe një çmim special për produktin më me ndikim në historinë e saj, i cili iu dha Apple iPod. Kryeredaktori i T3, Mat Gallagher, e cilësoi iPod-in si pajisjen që revolucionarizoi mënyrën se si dëgjohet muzika dhe që hapi rrugën për zhvillimin e iPhone.
Mes fituesve të tjerë ishin Nothing Phone (4a) Pro si telefoni më i mirë i kategorisë së mesme, Bowers & Wilkins Px8 S2 si kufjet më të mira, Sony WH-1000XM6 si kufjet më të mira për udhëtim, Bose QuietComfort Ultra Earbuds si earbuds-et më të mira, si dhe LEGO Smart Play, që fitoi çmimin për inovacionin teknologjik.
Suksesi i Galaxy S26 Ultra konfirmon edhe një herë pozicionin e Samsung në segmentin premium të telefonave inteligjentë, duke lënë pas konkurrencën dhe duke fituar një nga vlerësimet më të rëndësishme në industrinë e teknologjisë.
