Microsoft pritet të investojë rreth 1.6 trilionë jen (afërsisht 10 miliardë dollarë) në Japoni, në kuadër të një plani për zgjerimin e infrastrukturës së inteligjencës artificiale dhe shërbimeve “cloud”.
Njoftimi u bë gjatë një takimi në Tokio mes nënkryetarit të kompanisë, Brad Smith, dhe kryeministres japoneze, Sanae Takaichi, raportoi Kyodo News.
Sipas planit, investimi do të shtrihet nga fillimi i vitit 2026 deri në vitin 2029 dhe do të realizohet në bashkëpunim me kompani japoneze si SoftBank Group dhe Sakura Internet.
Zyrtarët e Microsoft theksuan se kjo nismë synon të mbështesë zhvillimin ekonomik të Japonisë përmes forcimit të infrastrukturës dixhitale, e cila konsiderohet kyçe për teknologjitë e së ardhmes.
Ky investim përbën një zgjerim të konsiderueshëm të planit të mëparshëm prej 2.9 miliardë dollarësh të njoftuar në vitin 2024, që kishte në fokus përmirësimin e qendrave të të dhënave dhe rritjen e kapaciteteve “cloud” në vend.
