Presidenti i Shteteve të Bashkuara, Donald Trump, ka deklaruar se ka lënë udhëzime të qarta për mënyrën se si duhet të reagojë administrata amerikane në rast se Irani realizon një atentat ndaj tij, duke paralajmëruar Teheranin me një kundërpërgjigje të ashpër.
Në një intervistë për New York Post, Trump u shpreh se ka dhënë urdhra specifikë për veprimet që duhet të ndërmerren nëse Irani do të arrijë të zbatojë ndonjë plan për eliminimin e tij.
“Jam në listën e tyre prej shumë kohësh. Kjo është ajo me të cilën përballemi”, deklaroi Trump, duke përsëritur qëndrime të ngjashme që kishte shprehur edhe gjatë vizitës së tij të fundit në Ankara, në kuadër të Samitit të NATO-s.
“Kam lënë urdhra që, nëse ndodh diçka, thjesht t’i bombardojnë, fjalë për fjalë, në një nivel që nuk e kanë parë kurrë më parë”, tha presidenti amerikan.
Deklaratat e Trump erdhën pasi u pyet për raportimet e fundit se Izraeli kishte ndarë me Shtetet e Bashkuara informacione të inteligjencës që lidhen me një plan të dyshuar për atentat ndaj tij.
Sipas një raporti ekskluziv të Wall Street Journal, shërbimi sekret izraelit, Mossad, u ka përcjellë agjencive amerikane të inteligjencës informacione për një plan të ri të dyshuar iranian që synon vrasjen e Donald Trump.
Megjithatë, presidenti amerikan la të kuptohet se nuk e konsideron këtë një kërcënim të ri, duke theksuar se, sipas tij, Irani ka synuar eliminimin e tij prej vitesh.
