Ambasada e Shteteve të Bashkuara në Tiranë ka lëshuar një paralajmërim për qytetarët shqiptarë që përdorin vizat turistike për të udhëtuar në SHBA me qëllim lindjen e fëmijëve.
Në një njoftim zyrtar, ambasada thekson se prindërit që udhëtojnë në Shtetet e Bashkuara me vizë turistike dhe përfitojnë nga programet publike amerikane për të mbuluar shpenzimet e lindjes, mund të mos kualifikohen për rinovimin e vizës në të ardhmen.
Sipas njoftimit, disa shtetas shqiptarë përdorin programin Medicaid për të përballuar kostot e kujdesit shëndetësor gjatë lindjes, ndërsa këto shpenzime mbulohen nga taksapaguesit amerikanë.
“Prindërit që përdorin viza turistike për të lindur në SHBA mund të mos kualifikohen për rinovimin e vizave të tyre në të ardhmen”, thuhet në reagimin e Ambasadës së SHBA.
Autoritetet amerikane rikujtojnë se viza turistike duhet të përdoret vetëm për qëllimin për të cilin është lëshuar. Sipas ambasadës, përdorimi i saj për të përfituar nga programet publike ose për qëllime që bien ndesh me kushtet e vizës mund të ndikojë negativisht në aplikimet e ardhshme për vizë.
