Presidenti i SHBA-së, Donald Trump, deklaroi se Irani i ka kërkuar Uashingtonit të rifillojë bisedimet mes dy vendeve dhe se administrata amerikane ka pranuar këtë kërkesë. Megjithatë, ai theksoi se armëpushimi i arritur muajin e kaluar mes SHBA-së dhe Iranit nuk është më në fuqi.
“Republika Islamike e Iranit na ka kërkuar të vazhdojmë bisedimet. Ne kemi rënë dakord ta bëjmë këtë, por Shtetet e Bashkuara ua kanë bërë të qartë se armëpushimi ka përfunduar”, shkroi Trump në platformën e tij Truth Social.
Muajin e kaluar, SHBA-ja dhe Irani nënshkruan një memorandum mirëkuptimi, me ndërmjetësimin e Pakistanit, me synimin për t’i dhënë fund përplasjes ushtarake dhe për të hapur rrugën drejt një marrëveshjeje afatgjatë paqeje.
Megjithatë, tensionet janë përshkallëzuar sërish ditët e fundit. Pas sulmeve iraniane ndaj tre anijeve tregtare në Ngushticën e Hormuzit, SHBA ndërmori sulme ndaj objektivave iraniane, ndërsa Teherani u kundërpërgjigj me goditje ndaj infrastrukturës ushtarake amerikane në Bahrein, Kuvajt, Katar dhe Jordani. Pavarësisht rifillimit të kontakteve diplomatike, situata mes dy vendeve mbetet tepër e tensionuar.
