Edi Rama prej disa ditësh po shfaqet si kryepolici bashkiak i Vlorës dhe Shqipërisë në përpjekje për të larguar ndërtimet pa leje… të ndërtuara gjatë qeverisjes së tij. Në disa vajtje-ardhje në Vlorë, kryeministri i Shqipërisë ka ashpërsuar tonet dhe ka kërkuar vigjilencë dhe punë konkrete nga organet lokale, jo vetëm në Vlorë, por dhe në Tiranë e qytete të tjera për të zhbllokuar sipas tij hapësira të zëna pa leje. Madje, për t’i ardhur pas fijes Ramës, dje u shfaq me mikrofon në këmishën e djersitur edhe ministri i Brendshëm, i cili, pasi “suksesit” në detyrën e tij parësore, tashmë po bën prova gjenerale për të larguar tavolina, karrige apo tenda të vendosura pa leje.
Për të mos prekur temën e ndjeshme të ndërtimeve pa hesap në Tiranë, të cilat në fakt shërbejnë edhe si lavatriçe e parave të pista, ky aksion përveç show-t politik tregon qartas dështimin e shtetit në menaxhimin e pronave publike.
Nëse është abuzuar me hapësirat publike, kush e mban përgjegjësinë që për kaq kohë ato qëndruan të bllokuara? Dorëheqjet e drejtorëve nuk janë të mjaftueshme nëse ata kanë shkelur ligjin. Dhe për këtë sigurisht duhet të vendosë drejtësia. Nga ana tjetër, Edi Rama erdhi në pushtet në vitin 2013 me një aksion për prishjen e ndërtimeve pa leje, shtesave të pallateve ekzistues dhe të ngjashme me këto. Si ka mundësi që në 3 mandate asgjë nuk u përmirësua? Përkundrazi, tashmë duhet një aksion i radhës për të prishur ndërtimet e bëra po nga administrata e Ramës. Kjo është mendësia e funksionimit të një shteti privat, drejtuar nga një njeri që çdo akt e ndërmerr si aksion. Pa kuptuar se shteti ligjor dhe ai i vërteti nuk funksionojnë me orare por 24 orë në 24. E deri sa kjo të ndodhë, të gjithë do “shijojmë” frutet e aksioneve që nisin dhe përfundojnë me oreksin e kryeministrit.
