“Beteja vazhdon” – kështu e ka mbyllur statusin e saj, falënderuar votuesit socialistë të Tiranës, Blerina Gjylameti. Me një shprehje epike të Lulzim Bashës, zonja Gjylameti duket po aq qesharake sa ai, teksa komenton betejën e fundit të saj në politikë. Fjala është për rinumërimin e votave për kandidatët e listës së hapur të Tiranës, ku mandatin ia “rrëmbeu” për një grusht votash Olta Xhaçka.
Deri në momentin që gara zhvillohet brenda llojit, sigurisht që ka vend për interpretime dhe keqkuptime deri në votën e fundit. Madje deri diku mund të konsiderohet i respektueshëm dhe vendimi për të kërkuar rinumërim. Një qasje normale në kushtet e absurdit të zhvillimit të zgjedhjeve në Shqipëri.
Por çfarë ndodh kur “shefi i madh” dërgon një mesazh dhe udhëzon “prapakthehu” për të gjithë ata që kanë kërkuar rinumërim votash? Të gjithë kthehen direkt pas dhe, pa shumë pretendime, i binden kryetarit të partisë. Ai, pasi ka marrë çka dashur nga procesi elektoral, tashmë ndihet i bezdisur nga cic-micet e atyre që janë në garë me njëri-tjetrin për të kapur mandatin që Edi Rama ua ka vendosur si trofe në finishin e një gare, ku ai ka zgjedhur garuesit dhe ka parashikuar fituesit.
Ndaj, me një mesazh, i gjithë kontributi politik (nëse mund të quhet i tillë) i Blerina Gjylametit dhe shokëve e shoqeve të partisë së saj përkthehet në një falënderim qesharak dhe tërheqje nga përpjekja për të rinumëruar votat – një e drejtë që ta jep Kodi Zgjedhor.
Në një fushë politike me lojtarë pa personalitet dhe dinjitet, sjellja servile ndaj “shefit të madh” nuk habit më askënd. Madje, nuk do të jetë e largët dita kur Edi Rama do të vendosë jo emra, por thjesht numra në kostumet e deputetëve të tij, për të lehtësuar rreshtimin dhe për të kursyer kohën që t’u drejtohet me emra, atyre që s’kanë më as dëshirën dhe as vullnetin të jenë të tillë.
