Nga Desada Metaj
Sot në mëngjes, kryekomisioneri Ilirjan Celibashi u shfaq në Syri TV si komentator i lirë për procesin e 11 majit. Madje, herë pas here ai komentonte dhe pamjet e vëna nga drejtuesi i emisionit. Deri këtu gjithçka duket normale për një vend demokratik. Por, në fakt, në detyrën e Komisionerit Shtetëror të Zgjedhjeve, zoti Celibashi ka disa kompetenca që nuk mund t’i tejkalojë duke bërë komente për parregullsi apo shtrembërim të procesit.
“Nëse ato pamje janë të tilla në 5 mijë, apo 1 mijë, apo në 200 apo 300 qendra votimi, është vërtetë problematike. Këtë nuk e dimë. Por do të duhet ta pranojmë që ajo pamje vendos pikëpyetje të mëdha mbi administrimin e procesit zgjedhor,” deklaroi sot kryekomisioneri si komentator i lirë i disa pamjeve filmike, duke harruar (me ose pa qëllim) se kjo nuk është një kompetencë e tij. Ligji ka përcaktuar se kjo kompetencë i takon KAS-it.
Si avokat, konsulent, biznesmen, analist, opinionist e çfarëdo tjetër që preferon të mbathë dhe të shfaqet në media, Ilirjan Celibashi është i lirë të bëjë çfarë të dojë. Shqipëria është një vend i lirë dhe fjala gjithashtu është e lirë. Por, që të kesh këtë liri të plotë në gjykimin e një fenomeni, në vendin e Celibashit duhet të ndërrrosh kostumin e kryekomisionerit me atë të analistit.
Më shumë se një herë në këto zgjedhje, Komisioneri Shtetëror i Zgjedhjeve ka zgjedhur që të ndërhyjë me komente, analiza ose opinione personale.
Të njëjtën gjë bëri edhe një ditë më parë kur dha opinione personale dhe vlerësime private për pamje e filmime, që Komisionerit Celibashit nuk i takojnë t’i vlerësojë. Aq më shumë, t’i analizojë ato në kushtet kur organe të tjera të KQZ-së e kanë kompetencën. Në postin e Komisionerit, Celibashi mund të bëjë mrekullinë, por liria e tij mbaron deri në kufijtë e atyre kompetencave që Kodi i parashikon.
Nëse zgjedh të thotë se: “Në këto qendra votimi procesi duket të jetë jashtë standardit,” atëherë Celibashi duhet të shohë më shumë se videon – karrigen e vet si kryekomisioner.
Shprehje të tipit:
“Nëse ato pamje janë të tilla në 5 mijë, apo 1 mijë, apo në 200 apo 300 qendra votimi, është vërtetë problematike. Këtë nuk e dimë. Por do të duhet ta pranojmë që ajo pamje vendos pikëpyetje të mëdha mbi administrimin e procesit zgjedhor,” mund të shërbejnë për destabilizim të procesit. Ose si oksigjen për ata që kanë pretendime nga procesi, që administrohet po nga Ilirjan Celibashi.
Sido të jetë, me daljet e tij të fundit, kryekomisioneri përveç faturave të kripura për rinumërimin, po e rrit dozën dhe me deklarata që nuk i takojnë pozicionit që mban. Se e shtyn halli apo për qejf, këtë nuk di ta thotë njeri me siguri. E sigurt është vetëm qetësia e tij për këto veprime, që nuk shqetësojnë as mazhorancën që e ka zgjedhur dhe as opozitën që e përkëdhel. Sa për median, me gjasë fondet për reklama kanë qenë mjaftueshëm që pakkush të shohë e të dëgjojë se kryeadministratori i “farsës zgjedhore” sipas opozitës dhe “zgjedhjeve më të mira ndonjëherë” të mazhorancës vazhdon të luajë i pashqetësuar me portat e politikës duke bërë gola nga të dy anët.
Kompetencat e Komisionerit Shtetëror të Zgjedhjeve sipas Kodit Zgjedhor:
• Drejton institucionin dhe e përfaqëson atë në marrëdhëniet me të tretët.
• Mbikëqyr veprimtarinë e administratës zgjedhore përgjatë zgjedhjeve dhe referendumeve.
• Vë në lëvizje Rregullatorin dhe KAS-in, duke përgatitur mbledhjet dhe seancat për çështje që janë në kompetencën e tyre.
• Emëron dhe shkarkon anëtarët e KZAZ-ve.
• Kujdeset për zbatimin e ligjit në mënyrë të drejtë dhe uniforme nga të gjitha institucionet.
• Monitoron sjelljen e institucioneve publike gjatë fushatës dhe përdorimin e burimeve publike.
• Informon publikun për veprimtarinë e KQZ-së dhe vendimmarrjet e saj.
• Adminstron buxhetin e KQZ-së sipas rregullave përkatëse.
• Raporton para Kuvendit për veprimtarinë e institucionit.
