Rama vazhdon debatet në distancë me drejtësinë. Pas deklaratës së djeshme për reagimin e Unionit të Gjyqtarëve, sot kryeministri ka vijuar ankesat duke iu referuar periudhës 7-vjeçare që iu desh gjykatës për të dhënë vendim mbi çështjen mes tij dhe Lulzim Bashës, kur ky i fundit ishte kryetar i PD.
A do zgjohet nga gjumi qeveria e Gjyqësorit, me këshilltarët e inspektorët e lartë dhe qindra punonjësit e administratës së saj të aq mirëpaguar, për t’i kaluar në filtrin e përgjegjësisë së lartë publike bëmat dhe gjëmat me të cilat përballet e drejta e njerëzve të zakonshëm në sallat e gjyqeve?! - shkruan kryeministri në reagimin e tij, duke iu bashkuar shqetësimit të mijëra qytetarëve, halli i të cilëve rastësisht ndodhi që të ishte i njëjtë me atë të Edi Ramës.
Rama më tej vijon: Këtu halli është si do u vejë halli çështjeve shumë më të rëndësishme të njerëzve, që varen nga mendja e gjykatëses në fjalë apo të tjerëve si ajo, të cilët e kanë nivelin logjik nën kapacitetin e një 12-vjeçari!!!
Qartas, kryeministri fyen publikisht një gjyqtare të Republikës së Shqipërisë, e cila është Ëngjëllushe Tahiri. Mirë apo keq, e aftë apo jo, nuk mund të jetë kreu i ekzekutivit ai që përcakton nëse një gjyqtar është i zoti apo i paaftë, i korruptuar ose jo. Për më tepër, në një çështje ku ai është palë në gjykim.
Pas së djeshmes, kjo e sotmja dhe njëherë tregon qartë se Edi Rama tashmë nuk ruan më asnjë lloj kufiri dhe etike kur bëhet fjalë për gjyqësorin. Etiketimet e tij të ngjashme me ato të Sali Berishës për gjyqtarët e çështjes së tij edhe njëherë ngrenë shqetësimin e pamundësisë së funksionimit të gjyqësorit si i pavarur nga politika.
Bullizimi i pastër që Edi Rama i bën gjyqtares për shumëkënd mund të konsiderohet si hapi i radhës në një periudhë të shkurtër të mandatit të katërt, ku kryeministri i tregon “dhëmbët” drejtësisë me 84 votat e tij. Që me gjasë nuk do vonojnë të ndryshojnë ligje dhe, pse jo, vetë reformën e shumëdiskutuar të drejtësisë.
