Kryetari i Partisë Mundësia, Agron Shehaj, ka përsëritur idenë e tij për një kandidat të përbashkët të opozitës për Bashkinë e Tiranës. Në një intervistë për Neës24, Shehaj tha se është e vetmja mundësi që opozita t’i marrë bashkinë Edi Ramës.
“Kryetari i Bashkisë së Tiranës është nën arrest dhe do të kemi zgjedhje për kryetar. Nëse ne duam, si opozitë, të fitojmë kundër Edi Ramës, atëherë duhet të kemi një kandidat të përbashkët. Kjo është e vetmja mënyrë që ne kemi. E vështirë, por kemi mundësi të fitojmë”, tha Shehaj.
Por sipas tij, ky kandidat duhet të jetë jopartiak, një kriter që përjashton kandidaturën e Ilir Alimehmetit për drejtimin e kryeqytetit.
“Shiko, unë nuk do të doja të hyja në emra. Unë i qëndroj propozimit tim për një kandidat jo partiak. Në rastin konkret, Ilir Aalimehmeti ka qenë kandidat, është anëtar i Partisë Demokratike”, tha Shehaj.
Insistimi i Shehajt për kandidat të përbashkët edhe pas deklaratës së Berishës që ishte dakord me propozimin e kreut të partisë Mundësia, shton mundësit që dy palët të bëjnë koalicion në zgjedhjet për bashkinë Tiranë. E vetmja pikë që mesa duket do të duhet të bien dakord, është për emrin e personit që duhet të zgjedhin, të jetë politik apo jo politik.
