Kreu i Partisë Mundësia, Agron Shehaj dhe kryetari i PD, Sali Berisha, mesa duket po shkojnë drejt gjetjes së një gjuhe të përbashkët që në zgjedhjet e ardhshme për bashkinë e Tiranës të dalin me një kandidat të përbashkët.
Të paktën këtë kanë lënë të kuptohet dy krerët e partive pas deklaratave që kanë bërë së fundmi. I pari që ka hedhur idenë ka qenë Agron Shehaj në emisionin “Erla Now” në Euroneës Albania mbrëmjen e djeshme, ku tha se opozita e përçarë e ka të pamundur të fitojë në bashkinë e Tiranës, pasi këtë tregon edhe rezultati i 11 majit. Sipas tij, e vetmja mundësi që bashkia e kryeqytetit mos t’u lihet sërish socialistëve, është që partitë opozitare të mbështesin një kandidat jo politik.
“Ekziston një mundësi për këtë, dhe mundësia është nëse ne do vendosim të gjithë bashkë të kandidojmë dhe mbështesim një kandidat jo politik. Të gjejmë një kandidat, anëtar të asnjë partie politike, por një kandidat teknik që gëzon respektin e shoqërisë shqiptare”, tha Shehaj.
Përgjigjen e parë Shehaj e mori nga kreu i PD, Sali Berisha, i cili në konferencën për mediat mesditën e sotme, u shpreh se është dakord që të dalin me kandidat të përbashkët, duke theksuar se e mbështet plotësisht propozimin. Por sipas tij, kandidati duhet të jetë politik.
“Për të dalë partitë opozitare me një kandidat këtë e mbështes plotësisht, por që të pretendohet të zgjidhet kryetari i Bashkisë së kryeqytetit një njeri jopolitik këtë nuk e kam dëgjuar ndonjëherë.
Sepse të paktën duhet të ketë një program ku çmonton të gjithë batërdinë bazuar në politikën e narkoshtetit. Nuk e di ç’nënkuptohet me një kandidat jo politik, por për një kandidat të përbashkët, plotësisht e drejtë” – tha Berisha.
Përtej kandidatit nëse do jetë politik apo jo politik, pasi më shumë është çështje emri, parimisht duket se Shehaj dhe Berisha po shkojnë drejt një koalicioni në zgjedhjet që mund të mbahen për bashkinë e Tiranës. Dhe nëse kjo do të ndodh zyrtarisht, ky do të jetë një ribashkim i dy ish-bashkëpunëtorëve në PD.
