Deputetja e Partisë Demokratike dhe kryetarja e Komisionit të Çështjeve Europiane, Jorida Tabaku, ka ngritur shqetësimin e saj mbi përfshirjen e ambasadorëve shqiptarë në aktivitete politike të organizuara nga qeveria. Gjatë një seance dëgjimore me ministrin e Jashtëm, Igli Hasani, Tabaku e quajti këtë përfshirje “të papranueshme” dhe e akuzoi qeverinë për përdorim të trupit diplomatik për përfitime partiake.
Sipas Tabakut, në të paktën 48 raste, ambasadorët shqiptarë kanë marrë pjesë në aktivitete ku opozita është sulmuar, me këto evente që janë zhvilluar nën flamurin e Partisë Socialiste. Ajo vuri në pikëpyetje nevojën e pjesëmarrjes diplomatike në këto aktivitete, duke kërkuar shpjegime nga ministri Hasani për masat e marra për të shmangur një përfshirje të tillë.
“Shërbimi diplomatik duhet të jetë i paanshëm dhe të përfaqësojë interesat kombëtare, jo të shfrytëzohet për fushata elektorale,” tha Tabaku. Ajo theksoi se përfshirja e përfaqësuesve diplomatikë në aktivitete me ngjyrime partiake dëmton besueshmërinë e shërbimit diplomatik të Shqipërisë dhe përfaqësimin ndërkombëtar të vendit.
