Ambasadori i Shqipërisë në Maqedoninë e Veriut, Denion Mejdani, nuk e ka fshehur pëlqimin e tij për Richard Grenell. Ambasador në SHBA dhe i dërguari për Ballkanin, dhe njëri i afërt me presidentin e votuar Donald Trump ka gjithashtu foto me një pjesë të mirë të politikanëve majtas e djathtas në Shqipëri. Në këtë garë për t’u dukur sa më afër Grenell, ambasadori i Shqipërisë duket të jetë i angazhuar seriozisht. Aq sa nga profili zyrtar i tij në platformën X (ish-Twitter), ai ka marrë pjesë dhe në një sondazh online të organizuar nga Corey Lewandowski, lobist dhe komentator politik, i njohur për lidhjet e tij me Donald Trump.
Mes emrave të servirur nga lobisti amerikan, ambasadori Denion Mejdani ka zgjedhur sigurisht Richard Grenell. Por a është e përshtatshme që një përfaqësues i shtetit shqiptar të përfshihet në të tilla sondazhe online? A mundet që një ambasador të japë opinion publik për zgjedhjen e një zyrtari të lartë të një shteti tjetër? Vetë qenia diplomat mban në vetvete kujdesin për të dhënë opinione mbi zhvillimet e një vendi tjetër. Gjë që, me sa duket, diplomatët shqiptarë e kanë të vështirë ta kuptojnë.
Sepse jo më kot, shumë prej tyre shfaqen publikisht në takimet politike të kryeministrit duke lënë mënjanë kostumin e diplomatit e duke u shndërruar në manekinë politikë. Apo servilë diplomatësh të lartë, me të cilët nuk i lidh asgjë veç interesit personal.
[caption id="attachment_19181" align="alignnone" width="300"]
Screenshot[/caption]
