Një ditë pas mbërritjes së gjashtë emigrantëve në kampin e Gjadrit, si pjesë e marrëveshjes Shqipëri-Itali dhe paktit Meloni-Rama, kampi u vizitua nga një delegacion i deputetëve të opozitës italiane.
Deputetët Italian ishin Rachele Scarpa dhe Andrea Casu, nga Partia Demokratike, si dhe Alfonso Colluçi nga "Lëvizja 5 Yjet". Deputetët opozitarë, të cilët janë kritikë të qeverisë "Meloni", vizituan ambientet e kampit dhe kërkuan të takonin emigrantët që ishin mbërritur me anijen "Libra" të premten. Në portin e Shëngjinit zbritën 8 emigrantë, por pas një verifikimi në qendrën e shëndetit, 2 prej tyre u kthyen mbrapsht, sipas autoriteteve lokale.
Deputeti Alfonso Colluçi nga "Lëvizja 5 Yjet" ngriti akuza të forta ndaj qeverisë Meloni për shpërdorimin e fondeve të taksapaguesve italianë, duke e cilësuar kampin e Gjadrit si një "burg për emigrantët". Ndërkohë, deputetja Rachele Scarpa, e Partisë Demokratike, theksoi se një nga emigrantët e kthyer kishte probleme psikike dhe e pyeti qeverinë italiane se si ishte e mundur që ai të nisej nga Italia në atë gjendje.
“Donim t’i takonim dhe besoj se sot pasdite do jetë e mundur. Jemi në një zonë militare, jemi këtu jashtë dhe kemi këto mure tepër të larta. E vetmja gjë pozitive që shoh këtu në kamp janë operatorët e shumtë të policisë, që përcjellin këtu brenda na kamp jo vetëm profesionalizimin, por edhe humanizmin e Italisë. Këtu të duket sikur je jashtë humanizmit. Të mendosh që këto struktura do kushtojnë 800 milionë euro në 5 vite, shto edhe kostot e mirëmbajtjes, dhe 9 milionë euro vetëm për transportin. Për këtë të vjen keq, taksat e italianëve po harxhohen dhe nuk po investohen në Itali për shërbimin e sigurisë në vend, për qytetarët e Italisë. Të vjen keq vërtet, sepse këtu duket më shumë si një mbajtje në burg e këtyre personave, sepse ju kujtoj që e thotë edhe protokolli shqiptar, që këta persona nuk mund të dalin. Pra kemi një formë të rëndë të mbajtjes tyre të mbyllur. Këtu gjithçka është e ndërtuar nga zero dhe ka ende për të ndërtuar dhe kjo të jep idenë se qeveria Meloni hedh paratë e italianëve nga dritarja” – tha Alfonso Colluçi.
“Për momentin nuk kemi arritur ende të flasim me emigrantët e mbërritur në kamp, sepse janë duke u zhvilluar dëgjesat me kontrolluesit e territorit. Zbuluam nacionalitetin dhe gjendjen e personit që dje u kthye sërish në Itali dhe bëhet fjalë për një egjiptian. Kishte problem psikiatrike dhe u kthye mbrapsht. Këtu pyesim se si ishte e pamundur mos të vihej re kjo gjë gjatë procesit screening (verifikimi), para se të hipte në anije. Do të futemi brenda besoj sot pasdite, sapo të jenë mbyllur kontrollet e plota dhe të kuptojmë pak më shumë për historinë e tyre” – tha Rachele Scarpa.
