Kryetari i Partisë Demokratike, Sali Berisha, ende nuk ka përcaktuar kohën kur do të zhvillohen primaret për listën e kandidatëve për deputetë. Duke iu përgjigjur ndjekësve të tij, ai deklaroi se primaret do të zhvillohen “në momentin oportun.”
Berisha e cilësoi fitoren e Donald Trump në zgjedhjet presidenciale amerikane si një fat të madh për familjen shqiptare. Ai kujtoi atmosferën në selinë e PS natën e zgjedhjeve, ku, sipas tij, qeveritarët kishin përgatitur fishekzjarre dhe shampanjë, duke besuar në fitoren e Kamala Harris. Sipas Berishës, ata dolën kokulur dhe të trishtuar në orët e para të mëngjesit.
Duke komentuar mbi pjesëmarrjen e deputetëve të opozitës në seancën parlamentare për buxhetin, Berisha theksoi se nuk ka pasur asnjë vendim për bojkotin e parlamentit, por vetëm për komisionet, pasi përjashtimi i 24 deputetëve pengonte punën e tyre. Ai shtoi se opozita do të vazhdojë të ndjekë mosbindjen civile dhe se kthimi i tyre në parlament kishte për qëllim përballjen direkte me deputetët dhe ministrat e PS për buxhetin.
Në lidhje me zgjedhjet në SHBA, Berisha deklaroi se perandoria e Sorosit ka marrë fund në Amerikë, por vazhdon të mbretërojë në Shqipëri. Ai gjithashtu kritikoi kandidaten demokrate Kamala Harris për agjendën e saj mbi ndryshimin e gjinisë, duke e cilësuar si një tejkalim të ideologjisë marksiste. Sipas tij, me fitoren e Trump, ndikimi kulturor i SHBA do të rikthehet në vlerat universale.
