Endri Shabani refuzon bashkëpunimin me Bashën në zgjedhjet e 2025-ës, nuk përgënjeshtron bisedimet me të
Kryetari i nismës “Thurrje”, Endri Shabani, ka reaguar pas deklaratës së Lulzim Bashës mbrëmjen e djeshme në emisionin “Log”, i cili tha se është në fazë të avancuar diskutimi me Nismën Thurje, për bashkëpunim elektoral në zgjedhjet e 2025.
“Me Shabanin dhe aktorë të tjerë politikë jemi në fazë të avancuar të diskutimit të bashkëpunimit elektoral në zgjedhjet e ardhshme parlamentare. Ka individë që kanë dhënë kontribut në kohë të vështira të Shqipërisë dhe besojnë se vendit nuk mund ti mohohet një alternative e vërtetë dhe të mbetet në kafazin e zotit Rama dhe kë ai do të ketë përballë në zgjedhjet e ardhshme”, tha Basha.
Por Shabani nga ana tjetër e ka refuzuar një bashkëpunim të tillë. Me anë të një postimi në facebook, ai është shprehur se “ka zero shanse që unë apo nisma Thurje të jemi bashkë me Lulzim Bashën në zgjedhjet e 2025-ës”.
Por në reagimin e tij të shkurtër, Shabani nuk jep detaje nëse kanë qenë në bisedime e sipër apo ta konsideronte gënjeshtër deklaratën e Bashës.
