Prokuroria e Posaçme dërgon fletëthirrje të re Gazmend Bardhit që të paraqitet me datë 24 maj për të dhënë shpjegime si person që ka dijeni për dosjen XIbraka. Bardhi ishte ftuar të paraqitej në SPAK, por për shkak të një angazhimi pune kërkoi shtyrjen e seancës së marrjes në pyetje.
Pak javë më parë, Bardhi në një konferencë për shtyp denoncoi implikimin sipas tij të Olsi Ramës në laboratorin e kokainës në XIbrakë. Sipas Bardhit, vëllai i kryeministrit kishte përdorur të njëjtën makinë që përdornin bosët e Xibrakës.
Më poshtë njoftimi i SPAK:
Në vijim të kërkesës së Kreut të Grupit të PD Gazment Bardhi për pamundësinë për tu paraqitur nesër (datë 15 Maj) në SPAK, për shkak të një vizite zyrtare në Bundestag, z. Bardhi do të paraqitet më datë 24.05.2024, ditën e premte, ora 10:00, me qëllim pyetjen e tij si person që ka dijeni për rrethana të hetimit, në lidhje me procedimin penal nr. 88, të vitit 2024, të regjistruar në Prokurorinë e Posaçme Kundër Korrupsionit dhe Krimit të Organizuar, pas rifillimit të hetimeve të pezulluara në lidhje me procedimin penal nr. 335/1 (dojsa “Xibraka”), të vitit 2016 të regjistruar në ish-Prokurorinë pranë Gjykatës së Shkallës së Parë për Krime të Renda, Tiranë.
