Ilirjana Nano mban dy poste në KQZ dhe KLP, ndërsa institucionet ende nuk kanë sqaruar nëse ligji e lejon
Në Shqipëri, ndërsa politika debaton për karriget e dialogut, një tjetër çështje që lidhet me dy karrige institucionale vazhdon të mbetet pa përgjigje. Ilirjana Nano ushtron njëkohësisht funksionin e Kryetares së Komisionit Rregullator të Komisionit Qendror të Zgjedhjeve dhe atë të Sekretares së Përgjithshme të Këshillit të Lartë të Prokurorisë. Prej muajsh, institucionet përgjegjëse nuk kanë dhënë një qëndrim përfundimtar publik nëse mbajtja e të dy funksioneve është në përputhje me ligjin.
Çështja merr rëndësi të veçantë për shkak të rolit të Nanos në procesin zgjedhor. Më 28 gusht 2025, ajo ishte një nga tre anëtarët e Komisionit Rregullator që votuan pro shpalljes së rezultatit përfundimtar të zgjedhjeve parlamentare të 11 majit. Vendimi u miratua me shumicën minimale, tri vota pro dhe dy kundër. Në nëntor 2025, Nano mori mandatin e ri në krye të Komisionit Rregullator, ndërsa më 15 prill 2026 rifilloi edhe detyrën e Sekretares së Përgjithshme të KLP-së.
Dokumentet e siguruara nga VNA tregojnë se Nano e njoftoi KLP-në për angazhimet e tjera, përfshirë funksionin në KQZ, vetëm më 27 prill 2026, dymbëdhjetë ditë pasi kishte rifilluar punën. Neni 47 i ligjit nr. 152/2013, “Për nëpunësin civil”, kërkon njoftim paraprak të eprorit dhe leje me shkrim për ushtrimin e veprimtarive të tjera me pagesë. Në dokumentacionin që KLP-ja i ka vënë në dispozicion VNA-së nuk rezulton një leje e tillë paraprake. Kjo nuk provon se ajo nuk ekziston, por kërkon një sqarim të dokumentuar nga institucioni.
Pas njoftimit të Nanos, KLP-ja iu drejtua ILDKPKI-së për çështjen e konfliktit të interesit dhe nisi verifikimin e veprimtarive të jashtme. Megjithatë, vetëm më 13 tetor 2026, rreth gjashtë muaj pas rikthimit të saj në detyrë, KLP-ja i kërkoi Departamentit të Administratës Publike të sqaronte nëse lejohej ushtrimi i njëkohshëm i dy funksioneve. Pra, ndërsa Nano vazhdonte të mbante të dy postet, institucioni ende kërkonte të përcaktonte nëse kjo situatë ishte ligjërisht e lejueshme.
Problemi nuk kufizohet vetëm te ligji për nëpunësin civil. Ai lidhet drejtpërdrejt edhe me Kodin Zgjedhor. Neni 15 kërkon që kandidatët për Komisionin Rregullator të plotësojnë kriteret e parashikuara për Komisionerin, ndërsa neni 13 përjashton nga kandidimi personat që, në atë moment, ushtrojnë detyrën si nëpunës të nivelit të lartë drejtues. Nano nuk ishte Sekretare e Përgjithshme e KLP-së kur mori mandatin e ri në nëntor 2025, por e rimori këtë status në prill 2026.
Pikërisht për situata që lindin gjatë ushtrimit të mandatit, neni 18/2 i Kodit Zgjedhor parashikon mekanizmin e shkarkimit kur shfaqen dhe vërtetohen nga organi shtetëror kompetent shkaqe, kushte apo kritere që do ta kishin penguar zgjedhjen. Kjo ngre pyetjen nëse rikthimi i Nanos në pozicionin e Sekretares së Përgjithshme të KLP-së përbën një pengesë ligjore për vazhdimin e mandatit në Komisionin Rregullator. Përgjigjja kërkon një vlerësim zyrtar, jo hamendësime.
Ndërkohë, KQZ-ja nuk i është përgjigjur kërkesës zyrtare për informacion që VNA i dërgoi më 24 shtator 2026. Ndryshe nga KLP-ja, e cila vuri në dispozicion dokumentacionin, KQZ-ja nuk ka dërguar as përgjigje, as dokumente dhe as njoftim për zgjatjen e afatit. Për këtë arsye, VNA i është drejtuar Komisionerit për të Drejtën e Informimit.
Heshtja e KQZ-së lë pa përgjigje disa pyetje thelbësore: A e ka deklaruar Nano pranë KQZ-së funksionin në KLP? A është verifikuar pajtueshmëria e dy posteve? A ekziston një akt zyrtar që e lejon mbajtjen e tyre njëkohësisht? Dhe a është shqyrtuar zbatimi i nenit 18 të Kodit Zgjedhor?
VNA nuk mund të konkludojë pa një vendimmarrje të organit kompetent se Ilirjana Nano ndodhet në papajtueshmëri ligjore. Por dokumentacioni i administruar deri tani tregon se dy funksionet vazhdojnë të ushtrohen paralelisht, ndërsa verifikimi institucional nuk ka prodhuar ende një përgjigje përfundimtare publike.
Përgjegjësia nuk i takon vetëm zyrtares që mban dy funksionet, por edhe institucioneve që duhet të garantojnë respektimin e ligjit. Nëse mbajtja e tyre është e ligjshme, KLP-ja dhe KQZ-ja duhet të publikojnë bazën ligjore dhe dokumentet që e vërtetojnë. Nëse organi kompetent konstaton papajtueshmëri, duhet të zbatohen procedurat dhe pasojat që parashikon ligji.
Në fund, çështja është shumë më e thjeshtë sesa shkresat dhe muajt e verifikimeve që e kanë shoqëruar. Politika mund të negociojë për karriget e dialogut, por institucionet nuk mund të negociojnë zbatimin e ligjit.
Nëse ligji i lejon të dyja karriget, le ta provojnë me dokumente. Nëse jo, njëra duhet të lirohet. Jo për t'i bërë vend dikujt tjetër, por për t'i bërë vend ligjit.
Investigimi i VNA-së vazhdon.
