Byroja Kombëtare e Hetimit, e njohur ndryshe si FBI-ja shqiptare, pritet të ketë një drejtues të ri. Një komision i përbërë nga Altin Dumani, kryeprokuror i SPAK-ut, dhe dy prokurorët e posaçëm, Arben Kraja dhe Behar Dibra, do të përzgjedhin kreun e ri të strukturës, e cila duket se u ka futur “të dridhurat” politikës shqiptare.
Në garë për këtë post është Gledis Nano, ish-drejtor i Përgjithshëm i Policisë së Shtetit. Nano erdhi si një emër premtues në krye të uniformave blu, por u shkarkua nëntë muaj më vonë dhe doli jashtë sistemit. Përmes këtij kandidimi, ai po përpiqet të rikthehet në strukturat e hetimit.
Jon Keta, ish-oficer gjyqësor i Prokurorisë për Krime të Rënda dhe aktualisht numri dy i BKH-së, është gjithashtu në garë për të marrë drejtimin. Keta konsiderohet një profesionist në fushën e hetimit.
Mentor Cuku, vëllai i kryekomisar Artan Cukut — i cili u ekzekutua tetë vite më parë në derën e pallatit ku banonte për shkak të detyrës — është kandidat për drejtues të BKH-së.
Në garë është edhe Elton Kërluku, hetues financiar pranë BKH-së. Kërluku ka qenë më herët shef sektori i krimit kibernetik në Ministrinë e Brendshme.
SPAK pritet të publikojë zyrtarisht listën me kandidatët për BKH dhe do t’ia propozojë KLP-së emrin e kandidatit që do të kalojë me sukses të gjitha fazat e testimit.
