Prokuroria e Tiranës ka përfunduar hetimet dhe ka dorëzuar për gjykim dosjen penale ndaj pesë shtetasve nga Kosova, të akuzuar për futjen në mënyrë të paligjshme të medikamenteve në Shqipëri. Të pandehurit Altin Maqastena, Bekim Zenuni, Andi Grabanica, Ardian Ismajli dhe Ferat Zenuni akuzohen për veprën penale “Kontrabandë me mallra të licencuara” kryer në bashkëpunim. Hetimi Sipas hetimeve, në dhjetor të vitit 2024, të pesë shtetasit mbërritën në Aeroportin e Rinasit nga Stambolli, duke transportuar 300 mijë euro cash dhe 14 valixhe me medikamente të paautorizuara. Kontrolli Pas një kontrolli nga strukturat doganore dhe Policia e Rinasit, u sekuestruan 1,057,840 njësi medikamentesh me mbishkrimin “Unified”, me një peshë totale prej 417.1 kg, së bashku me shumën monetare të padeklaruar. Ilaçet Prokuroria thekson se barnat e sekuestruara përbëjnë produkte të licencuara, të cilat sipas Ligjit nr. 105/2014 “Për barnat dhe shërbimin farmaceutik” kërkojnë: autorizim për tregtim, autorizim për përdorim dhe pullë kontrolli të lëshuar nga Autoriteti Kombëtar i Barnave dhe Pajisjeve Mjekësore (AKBPM). Akuza Hetimet provuan se veprimtaria ishte e organizuar dhe e kryer në bashkëpunim nga të gjithë personat e përfshirë.
