I penduari i drejtësisë, Erion Alibej, ka vijuar dëshminë e tij në Gjykatën e Posaçme kundër Korrupsionit dhe Krimit të Organizuar (GJKKO), ku ka rrëfyer detaje tronditëse mbi vrasjet mafioze të ndodhura në pranverën e vitit 2020 në qytetin e Durrësit.
Në fokus të dëshmisë ishin vrasjet e Dorjan Shkozës dhe Anxhelo Avdisë, të cilat sipas Alibejt, ishin pjesë e një hakmarrjeje të strukturuar ndaj njerëzve të afërt të Talo Çelës, kundërshtarit të tij kryesor.
Dëshmia e Alibejt:
“Ishte shumë e rëndësishme që të vritej Dorjan Shkoza. Ai ishte njeriu më i afërt i Talo Çelës.
Një natë më shkroi Nuredini: ‘Vëlla, mbaroi i pari, shiko TV.’
Pashë lajmet dhe mësova se ishte vrarë Dorjan Shkoza dhe një tjetër, Anxhelo Avdia, që nuk e njihja më parë. E pyeta Nuredinin: ‘Po ky i dyti pse?’
M’u përgjigj: ‘Edhe ky është i atyre.’”
Sipas Alibejt, automjetin e përdorur në vrasje e ka djegur Eljo Bitri, ndërsa bashkë me të ka qenë edhe një tjetër person që nuk e kujton me saktësi.
“Në atë periudhë kisha kontakte me një person që i thoshin ‘Hoxha’, mjek, që kishte katër gra. Ai më siguronte armë, të cilat i merrte nga Aleksandër Baho, ose siç i thoshin ndryshe ‘Sandër Baho’.
Sandri ishte burim informacioni për mua, interesohej për vrasjet që i ishin bërë familjes sime.”
Alibej përmendi gjithashtu emrin e policit Leonard Alltja, i cili sipas tij, i ka siguruar të dhënat e Dorjan Shkozës nga sistemi TIMS.
“Nuredinit për vrasjen i dhashë paraprakisht 50 mijë euro.”
Kur prokurori e pyeti nëse kishin rënë dakord që të vritej edhe kushdo tjetër që ndodhej me Shkozën, Alibej e mohoi:
“Jo, nuk ishte pjesë e marrëveshjes.”
Në vijim, Alibej tha se i ka dhënë Nuredinit edhe 100 mijë euro të tjera për një vrasje tjetër:
“Më vonë i dhashë edhe 100 mijë euro për vrasjen e Altin Ndocit. Në total i kam dhënë 150 mijë euro.”
