Në Gjykatën e Posaçme dëshmoi në procesin ndaj ish-kryebashkiakut të Shkodrës, Bardh Spahia, kallëzuesi Mark Molla.
“Në 2022 kam qenë administrator i Ujësjellësit Shkodër.
Si administrator kam bërë detyrën mirë. Nga ministrat Gjiknuri dhe Balluku, ujësjellësi Shkodër është vlerësuar si nga më të mirët.
Unë bëra një kallëzim penal, pasi ish-kryetarja, për shkak të performancës, më dha një mandat 3-vjeçar”, tha Molla.
Ai tha se nuk është lejuar të hyjë në institucion.
“Kam pritur vendimet e gjykatës. Nuk është shkelur vetëm një, por tre vendime.
Nëse bëhet një mbledhje asambleje për largimin e administratorit, administratori merr pjesë. Unë nuk jam thirrur asnjëherë.
Në maj 2022 jam njohur me një urdhër largimi, që ka ardhur me postë. Unë i jam drejtuar gjykatës. Gjykata nuk e ka njohur si vendim”, theksoi dëshmitari.
Kallëzuesi deklaroi se Spahia bëri një tjetër urdhër largimi për të.
“E godita në gjykatë, e cila po ashtu nuk e njohu vendimin e kryebashkiakut. Pas vendimit të tretë të largimit, erdhi një person nga Bashkia dhe më kërkoi të liroj zyrën.
I thashë që ta liroj vetëm nëse më thotë gjykata. Unë atë ditë shkova në Postribë, për çështje pune. Ndërkohë, godina e Ujësjellësit u rrethua nga policia dhe policia bashkiake.
Nga 320 punonjës, Spahia nxori një urdhër që lejonte të futeshin në institucion vetëm 62 veta.
Unë nuk kam bërë asnjë dorëzim. Zyra është thyer në formë absurde nga një komision. Në datë 9 është bërë thyerja, ndërsa komisioni që bëri thyerjen është miratuar në datë 10.
Për 2 vendimmarrjet e largimit jam lajmëruar përmes postës. Të tretën ma ka sjellë drejtuesja e Asamblesë”, tha më tej ai.
