Inspektorati Shtetëror i Punës dhe Shërbimeve Shoqërore ka vendosur sot pezullimin e punës në repartin e copëtimit të ferrokromit në kompaninë “Albchrome”, e cila ndodhet në zonën industriale të Paprrit, Elbasan.
Ky vendim u mor pas një incidenti të ndodhur këtë të mërkurë, ku mekaniku Rubin Meçja u plagos gjatë punës, kur një pllakë me peshë të konsiderueshme i ra mbi trup. Aksidenti ndodhi rreth orës 12:15 në repartin e copëtimit të ferrokromit.
Mësohet se Meçja po punonte së bashku me kolegë për ndërrimin e pllakave të copëtimit, një procedurë e kryer periodikisht në uzinën e Albchrome. Ai u godit në shpatull dhe shtyllën kurrizore nga një pllakë e copëtuesit, dhe u transportua menjëherë në Spitalin Rajonal të Elbasanit, më pas në repartin e Traumës në Tiranë.
Hetimet për rrethanat e aksidentit vazhdojnë.
