SPAK ka paraqitur si prova të reja në procesin gjyqësor për rrëmbimin dhe zhdukjen e Jan Prengës komunikimet në platformën SKY ECC mes Altin Hajrit, Dritan Rexhepit dhe Gentian Doci Funiqit.
Gjykata pritet të vendosë nëse do të pajisë avokatët me komunikimet e plota.
Prokurorët Elida Kaçkini dhe Behar Dibra deklaruan se, për këtë çështje, komunikimet janë të plota. Avokatët kundërshtojnë pikërisht përzgjedhjen nga ana e SPAK të atyre që konsiderohen prova, në një kohë kur komunikimet që mungojnë, sipas tyre, mund t’u shërbejnë mbrojtjes efektive të klientëve të tyre.
“Duhet të qartësoj se mes të pandehurve në këtë proces gjyqësor, komunikimet janë të plota. Ato që janë hequr janë komunikime të tyre me persona të tjerë. Në këtë kuptim, ne i qëndrojmë sekretit hetimor, pasi për Dritan Rexhepin kemi dyshime se është i përfshirë në trafikun e drogës. Në këtë gjykim ai është i pandehur për një tjetër vepër penale”, deklaroi prokurorja Elida Kaçkini.
Seanca e radhës u caktua në datën 20 qershor, ora 10:00.
