Mënyrat për të futur drogë në burgje janë nga më të ndryshmet. Madje, shkojnë dhe tej imagjinatës. Gjatë një kontrolli që u krye ditën e djeshme në paraburgimin 313 në Tiranë, u sekuestruan 17 doza kanabis dhe 12 kokainë. Dozat e drogës, sikurse shihet në fotot më lart, ishin futur brenda makaronave të gatuara.
Nga verifikimet rezultoi se kokaina dhe kanabisi ishin porositur në telefon nga i burgosuri O. Asllani dhe ushqimi u mor përsipër të dorëzohej nga shtetasi A. Xhamet, i afërmi i tij. Ky i fundit u arrestua për futje të sendeve të ndaluara në ambientet e paraburgimit. Kontrolli u krye dje nga Agjencia e Mbikëqyrjes në Sistemin e Ekzekutimit të Vendimeve Penale, në bashkëpunim me DPB-në.
