Mbrëmë u bë e ditur vendimi i Gjykatës së Apelit të Amiensit: biznesmeni shqiptar Ermal Beqiri, 44 vjeç, do të mbetet në paraburgim në shtëpinë e arrestimit të Beauvais. Kërkesa e tij për lirim, e paraqitur më 20 gusht, u rrëzua. Vendimin e sollën dje media franceze Courrier Picard dhe Paris-Normandie, ndërsa në Shqipëri u përhap natën e 25 gushtit.
Beqiri është në qeli prej rreth një muaji. Ai u ndalua në fund të korrikut pasi fluturoi me avion të lehtë mbi zonën e ndjeshme të centralit bërthamor të Penly, mes Dieppe dhe Le Tréport. Autoritetet e detyruan avionin të ulej në aeroportin e Méaulte, pranë Albert. U dënua me 7 000 euro gjobë për shkelje të hapësirës ajrore. Por liria nuk iu kthye: ndërsa ishte ende nën shoqërimin e xhandarmërisë, Franca u njoftua për kërkesën e Shqipërisë për ekstradim.
Çfarë dyshon drejtësia për pasurinë e tij në Francë
Hetimet e përbashkëta me autoritetet shqiptare kanë nxjerrë në dritë një listë pasurish që SPAK i cilëson me origjinë të dyshuar kriminale dhe për të cilat ka kërkuar sekuestrim. Media franceze i përsëriti dje një nga një.
Në territorin francez janë identifikuar llogari bankare me vlerë totale mbi 2 milionë euro, dy apartamente, automjete dhe një avion turistik. Më e diskutuar mbetet një kështjellë në departamentin e Oise, në veri të Parisit, e vlerësuar rreth 2,6 milionë euro. Sipas mediave shqiptare, bëhet fjalë për Château d’Auteuil në Berneuil-en-Bray, disa kilometra në jug të Beauvais, aty ku Beqiri mban sot paraburgimin. Prona është monument historik, me sipërfaqe rreth 1 200 metra katrorë. Regjistrat francezë tregojnë se u shit më 30 dhjetor 2024 për 2 612 200 euro, shumë që përputhet me shifrën e SPAK. 
Këto pasuri janë pjesë e dosjes që Shqipëria i ka dërguar Francës. Në Tiranë, Beqiri kërkohet për dyshime të rënda në dosjen e tenderëve të AKSHI-t: mashtrim dhe skemë e organizuar me tenderë publikë me vlera që arrijnë miliona euro, pastrim parash dhe pjesëmarrje në grup të strukturuar kriminal. SPAK e kishte shpallur në kërkim ndërkombëtar që nga dhjetori 2025.
Çfarë tha vetë në seancë
Më 20 gusht, para dhomës së hetimit të Apelit të Amiensit, avokati i tij pretendoi se paraburgimi ishte i paligjshëm. Argumenti ishte se klienti, përpara incidentit të Penly, kishte mësuar nga media shqiptare se ishte në kërkim dhe ua kishte treguar vetë autoriteteve franceze: “Është vënë në dispozicion, ka dhënë adresën. Si mund të flitet për person në arrati?”
Prokuroria franceze iu kundërvu lirimit. Arsyeja ishte e drejtpërdrejtë: Beqiri ka mjete dhe licencë piloti, pra mund të largohet shpejt.
Në fund mori fjalën vetë. Fjalët e tij i ka botuar Courrier Picard:
«Kam ardhur në Francë në moshën 16 vjeç, këtu kam familjen time të dytë. Po, lëviz shumë, Turqi, Slloveni, Francë… Mund të shkoja kudo, edhe në Dubai, por e dua Francën. Edhe nëse nuk kam zgjedhur vendin më të mirë për t’u fshehur, as më të mirin për taksat…»
Ekstradimi
Shqipëria e ka dërguar kërkesën zyrtare për ekstradim në fillim të gushtit. Franca e mban tani Beqirin në paraburgim pikërisht për këtë qëllim. Gjykata franceze do të vendosë nëse do ta dorëzojë te autoritetet shqiptare. Deri atëherë, pas vendimit të djeshëm të apelit, ai mbetet në qeli në Beauvais. Procedura nuk ka afat të shkurtër: mund të zgjasë javë ose muaj, në varësi të ankesave.
Media franceze e përshkruan si njeri që studioi në Francë, punoi në institucione publike shqiptare dhe u shfaq në LinkedIn me një foto pranë presidentit Macron, e realizuar gjatë vizitës së tij në Shqipëri në maj 2025. Sot i njëjti emër qëndron i lidhur me një kështjellë në Oise, miliona euro në llogari dhe një kërkesë ekstradimi që Apeli i Amiensit sapo e la në fuqi duke e mbajtur në burg.
