I dyshuari për mashtrim dhe përvetësim me anë të mashtrimit në Shqipëri, Ermal Beqiri, do të vijojë të qëndrojë në burg në Francë. Biznesmeni shqiptar u arrestua pasi fluturoi me avionin e tij mbi centralin bërthamor të Penly-së, ndërsa pasuritë e tij në territorin francez janë vendosur nën vëzhgimin e autoriteteve.
“Ti nuk na merr kurrë në telefon”: përveç rasteve kur është jetim, çdo fëmijë e ka dëgjuar të paktën një herë këtë fjali nga nëna e tij. Ndonjëherë edhe kur e ka telefonuar një ditë më parë. Kështu, më 25 korrik, Ermal Beqiri, shqiptar 44-vjeçar, vendosi të telefononte nënën.
Biznesmeni ndodhej në komandën e avionit të tij të vogël, mbi Seine-Maritime. Shpërqendrim? Gabim drejtimi? Ai përfundoi duke fluturuar mbi centralin bërthamor të Penly-së, midis Dieppe dhe Le Tréport, një objekt jashtëzakonisht i ndjeshëm.
Kur u ul në aeroportin e Méaulte, pranë Albertit, në departamentin Somme, e priste një grup autoritetesh. Ai u arrestua, iu paraqit prokurorit dhe më 27 korrik u gjykua në Amiens për fluturim të paautorizuar mbi një objekt bërthamor, në kuadër të procedurës së pranimit të fajësisë. Gjykata e dënoi me 7 mijë euro gjobë, një shumë që për një njeri të përshkruar si milioner konsiderohet pothuajse incident i vogël.
Por që nga ajo ditë, Beqiri nuk është liruar më. Ndërsa ende shoqërohej nga xhandarët, Shqipëria i dërgoi Francës kërkesën për ekstradimin e tij. Ai kërkohet në vendin e lindjes për vepra që lidhen me mashtrim dhe përvetësim të organizuar. Beqiri dyshohet se ka pasur rol në një skandal të madh korrupsioni, të lidhur me tendera të manipuluar, me shuma që arrijnë në miliona euro.
SPAK, Prokuroria e Posaçme kundër Korrupsionit dhe Krimit të Organizuar në Shqipëri, sipas deklaratave të raportuara nga AFP në fillim të gushtit, vlerëson se hetimet shtesë të kryera nga autoritetet franceze kanë bërë të mundur identifikimin e disa pasurive me origjinë kriminale të dyshuar të Ermal Beqirit në territorin francez.
Prokuroria shqiptare përmend veçanërisht llogari bankare me një shumë totale mbi 2 milionë euro, dy apartamente, një avion privat/turistik, automjete, si dhe një kështjellë në departamentin Oise, në veri të Francës, me vlerë blerjeje rreth 2.6 milionë euro.
Sipas disa mediave shqiptare, bëhet fjalë për kështjellën e Auteuil, në Berneuil-en-Bray, në jug të Beauvais.
Në “vendin e shqiponjave”, Ermal Beqiri nuk ka qenë gjithmonë një person i përjashtuar apo i diskredituar. Inxhinier i sistemeve të informacionit, i arsimuar në Francë, ai ka mbajtur poste të rëndësishme në institucione publike, ndërsa paraqitej edhe si ekspert i pavarur, veçanërisht, me një ironi të dukshme, në luftën kundër krimit kibernetik.
Në vitin 2021, ai bleu kompaninë Soft & Solution, të cilën më pas e zhvilloi në tregun shqiptar të teknologjisë së informacionit. Në profilin e tij në LinkedIn, Beqiri shfaq një fotografi në shoqërinë e presidentit francez Emmanuel Macron, që me sa duket është realizuar në maj 2025, gjatë vizitës zyrtare të presidentit francez në Shqipëri.
Prej një muaji, ai fle në burgun e Beauvais. Të enjten, më 20 gusht, Beqiri paraqiti para trupit gjykues të Apelit të Amiens kërkesën për t’u liruar.
Avokati i tij pretendon se klienti është viktimë e një “ndalimi të paligjshëm”. Ai kujton se, para incidentit të Penly-së, Beqiri kishte mësuar nga mediat shqiptare se ishte në kërkim dhe ua kishte bërë këtë të ditur autoriteteve franceze.
“Ai u vu në dispozicion të autoriteteve, dha adresën e tij. Si mund të flitet atëherë për një person në kërkim që është arratisur?”, argumentoi mbrojtja.
Prokuroria kundërshtoi lirimin e biznesmenit, me argumentin se mundësitë e tij financiare dhe licenca e pilotit do t’i mundësonin të largohej shpejt nga autoritetet.
Ermal Beqiri foli i fundit para gjykatës:
“Kam ardhur në Francë në moshën 16-vjeçare, këtu kam familjen time të dytë. Po, lëviz shumë: Turqi, Slloveni, Francë… Mund të kisha shkuar kudo, edhe në Dubai, por unë e dua Francën. Edhe pse nuk zgjodha vendin më të mirë për t’u fshehur, as vendin më të mirë për taksat…”
Më 25 gusht, gjykata mori vendimin: Ermal Beqiri do të vazhdojë të qëndrojë në burg.
