Detaje të reja janë zbardhur rreth lëvizjeve të 48-vjeçarit Altin Allmuça, përpara se të vriste bashkëkombasen e tij, 45-vjeçaren Julieta Obzova, në Greqi dhe më pas t’i jepte fund jetës.
Sipas informacioneve të raportuara nga mediat greke, përpara se të largohej nga banesa, Allmuça i kishte lënë bashkëshortes së tij 1 mijë euro, duke i thënë që “të vazhdonte të mbante para”. Më pas, 48-vjeçari është nisur drejt Nea Smyrnit, ku vrau 45-vjeçaren dhe menjëherë pas krimit kreu vetëvrasje.
Bashkëshortja e Allmuçës, e cila është thirrur për të dëshmuar, ka treguar para autoriteteve se prej rreth 18 muajsh kishte vënë re një ndryshim të ndjeshëm në sjelljen e tij.
Sipas dëshmisë së saj, 48-vjeçari mungonte shpesh nga shtëpia dhe në disa raste kalonte netët jashtë, pa i treguar se ku ndodhej. Ajo ka deklaruar gjithashtu se nuk kishte dijeni nëse bashkëshorti i saj kishte një marrëdhënie me një grua tjetër.
Gruaja ka pohuar gjithashtu para hetuesve se kishte frikë prej tij.
