Një ngjarje e rëndë është regjistruar në fshatin Kërvasari të Malishevës, ku një grua shtatzënë ka humbur jetën pasi është plagosur me armë zjarri. Prokuroria Themelore në Gjakovë bën të ditur se për vrasjen dyshohet bashkëshorti i viktimës, i cili gjithashtu është plagosur rëndë dhe ndodhet në gjendje kritike për jetën.
Sipas Prokurorisë, gruaja u transportua në Qendrën Klinike Universitare të Kosovës, por pavarësisht përpjekjeve të mjekëve dhe masave reanimatore, nuk mundi t’u mbijetonte plagëve.
Viktima ishte shtatzënë në javën e 34-të.
“Një person i gjinisë femërore, bashkëshortja e personit të dyshuar, si pasojë e plagëve nga arma e zjarrit ka ndërruar jetë në QKUK”, njoftoi Prokuroria Themelore në Gjakovë.
Edhe bashkëshorti i saj ka pësuar plagë të rënda nga arma e zjarrit dhe është dërguar për trajtim në QKUK. Sipas informacionit të përcjellë nga Prokuroria, gjendja e tij shëndetësore paraqitet e rëndë dhe kritike për jetën.
Ende nuk janë bërë të ditura të gjitha rrethanat dhe dinamika e të shtënave, ndërsa autoritetet po vijojnë hetimet për të përcaktuar se çfarë ka ndodhur në banesën e çiftit.
Prokurori i Shtetit ka dalë në vendngjarje, ndërsa me urdhër të tij trupi i viktimës është dërguar në Institutin e Mjekësisë Ligjore në Prishtinë, ku do t’i nënshtrohet autopsisë.
Për ngjarjen është iniciuar rasti për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.
Prokuroria Themelore në Gjakovë, në koordinim me Policinë e Kosovës, po vijon veprimet hetimore për zbardhjen e plotë të ngjarjes dhe sigurimin e provave që mund të përcaktojnë dinamikën dhe përgjegjësitë për rastin.
