Erion Alibej vazhdon të dëshmojë në Gjykatën e Krimeve të Rënda në procesin "Plumbi i Artë".
I penduari i drejtësisë, i njohur me nofkën "Krymi", rrëfeu edhe për vrasjen e Emiljano Ramazanit në vitin 2020, në Elbasan, tek rrethrrotullimi i Luleve.
“Në kohën kur vendosëm për Emiljano Ramazanin, për të cilin kishim informatorë, përveç Nuredinit, edhe Eljo Bitrin dhe Xhuljano Hoxhën. Donim ta vrisnim Emiljanon sepse ishte më aktiv në grupin e Çopjave, së bashku me Bujar Çelën, ky i fundit vëllai i Talo Çelës,” tha Alibej.
Ai deklaroi se vrasjen e Ramazanit e morën përsipër Henrik Hoxha dhe Skerdi Tase. Pohoi gjithashtu se kishin tentuar edhe më parë ta vrisnin, por nuk ia kishin dalë.
“Ditën e ekzekutimit, Emiliano Ramazani ishte te palestra. Në vrasje morën pjesë Henrik Hoxha dhe Skerdi Tase. Ai u qëllua me një pistoletë tip TT, ndërsa ende nuk e kishte fikur makinën,” shtoi Alibej.
“Pas ekzekutimit, vazhduan rrugën dhe në dalje të Elbasanit, e lanë armën në fshatin Brosh, me idenë që do ta kthenin dhe do ta fusnin në shtëpinë e Bujar Çelës. Henrik Hoxha gjithmonë merrte makina me qira për të kryer vrasje,” theksoi i penduari.
Ai sqaroi se Emiljano Ramazanin e njihte si mik të Mikael Qoses, i shpallur në kërkim si një nga autorët e masakrës së Bradasheshit, ku u vranë vëllai dhe xhaxhai i Alibej, si dhe një shtetas turk.
“Unë kam qenë komunikuesi. Çdo gjë që kam bërë e kam bërë me dijeninë e Nuredinit. Për vrasjen e Emiljanos kam qenë unë i interesuar. Nga ana ime, kam pasur informatorë Xhuljano Hoxhën dhe Nuredin Dumanin, si dhe Eljo Bitrin. Xhuljano Hoxha ka qenë në dijeni për vrasjen e Emiljanos dhe e kam paguar edhe për këtë rast. Për çdo vrasje paguheshin 100 mijë euro, por për vrasjen e Emiljanos kam paguar 75 mijë euro, sa më tha Nuredini. Të nesërmen pas ekzekutimit, kam dërguar Arsen Preçin te rrethrrotullimi i Tegut, ku e priti një vajzë në taksi, të cilës i dorëzoi paratë,” përfundoi Alibej.
