Kryetarja e Kuvendit, Elisa Spiropali, ka kthyer zyrat e këtij institucioni në një zgjatim të Partisë Socialiste. Kjo nuk është diçka e re për funksionarët e kësaj partie, por sot Spiropali ka shkelur çdo normë të etikës profesionale.
Zyra e shtypit e Kuvendit ka shpërndarë një njoftim për mediat, ku i fton ato të ndjekin një takim të kryetares së Kuvendit me fermerë të qarkut të Tiranës.
“Në datën 8 tetor, ora 12:00, Kryetarja e Kuvendit, znj. Elisa Spiropali, do të mbajë një fjalë në takimin me fermerët e qarkut Tiranë, mbi Skemën Kombëtare të Investimeve në Ferma, në Pallatin e Kongreseve, salla Albanologjia. Ju ftojmë të ndiqni dhe të pasqyroni këtë takim”, thuhet në njoftimin e Kuvendit.
Ky takim, që Spiropali zhvillon në cilësinë e drejtueses politike të fushatës së PS në Tiranë, së bashku me dy drejtuesit e tjerë politik të këtij qarku, Erion Veliajn dhe Ogerta Manastirliu, duhej të njoftohej nga zyra e shtypit e PS ose nga grupi i punës së fushatës.
Zyra e medias së Kuvendit duhet të jetë më e kujdesshme dhe të shpërndajë vetëm njoftime për aktivitete që lidhen me veprimtarinë parlamentare, dhe jo për takime partiake të kryetares së Parlamentit.
