Debate të ashpra kanë shpërthyer sot në Komisionin Hetimor për “Sterilizimin”, ku kryetarja e Komisionit, Albana Vokshi, është përplasur verbalisht me nënkryetarin e komisionit, Plarent Ndreca. Shkak për tensionet u bë përdorimi i një gjuhe të ashpër nga Ndreca, ndaj të cilës reagoi kryetarja Vokshi, duke i kërkuar të mos përdorte “fjalor rruge” gjatë seancës.
Gjatë debateve, Vokshi nuk e la Ndrecën të fliste, ndërsa deputetët e PD krijuan një kakofoni, duke goditur tavolinat për të ndërprerë fjalën e tij.
Përplasja verbale:
• Ndreca: “Nëse doni të bëni rrugaçin…”
• Vokshi: “Kujdes me fjalët! Kush je ti që flet me fjalor rruge këtu?”
• Ndreca: “Kupton shqip apo jo?”
• Vokshi: “E di më mirë se ty. Mos provoko! Ke kaq ditë që po provokon.”
Pas këtij momenti tensioni, Ndreca vendosi të mbyllë mbledhjen, ndërsa deputetët e mazhorancës u larguan nga salla. Deputetja e PD, Ina Zhupa, reagoi ashpër ndaj këtij vendimi, duke e quajtur Ndrecën “frikacak”.
“Frikacak! Kishe bërë ndërmend të bëje mbledhje pa opozitën. Tu prish skenari,” u shpreh Zhupa.
