Deputetja e PD-së ka drejtuar sot Komisionin Hetimor Parlamentar, një ditë pasi opozita organizoi protestën e madhe dhe paralajmëroi zgjatjen e procesit të mosbindjes civile.
Pavarësisht paralajmërimeve për mosbindje civile, protestës së djeshme dhe përplasjeve në parlament të enjten e shkuar, Komisioni Hetimor për koncesionet në shëndetësi është mbledhur sot dhe ka vijuar agjendën normalisht. Mes debateve dhe batutave pa shije dhe të përsëritura mes Albana Vokshit dhe Plarent Ndrecës, Komisioni Hetimor për koncesionet në shëndetësi duket se i ka hedhur një kovë me ujë të ftohtë zjarrit të mosbindjes civile.
Edhe pse nuk ka arritur në asnjë përfundim apo rezultat konkret, komisioni i drejtuar nga Albana Vokshi ka shënuar sot një arritje të vetme: atë të rikthimit të jetës normale të PD-së në parlament. Pak e çuditshme kjo, po të mendosh se deri mbrëmë vonë drejtuesit e opozitës paralajmëruan se mosbindja civile do të vijojë edhe në ditët në vazhdim.
