Një 44-vjeçar i dyshuar si pjesëtar i një grupi të strukturuar kriminal është ekstraduar nga Italia drejt Shqipërisë, në kuadër të bashkëpunimit mes Interpol Tiranës dhe Interpol Romës.
Sipas njoftimit zyrtar, operacioni ndërkombëtar “The Wanted” finalizoi procedurat për sjelljen në Shqipëri të shtetasit Sajmir Kolaveri, i shpallur në kërkim ndërkombëtar nga autoritetet shqiptare.
Gjykata e Posaçme kundër Korrupsionit dhe Krimit të Organizuar (GJKKO), me vendim të datës 25 shtator 2025, i kishte caktuar masën e sigurisë “Arrest në burg” për një sërë veprash të rënda penale, përfshirë “Vrasje për gjakmarrje”, “Fshehje ose asgjësim kufome”, si dhe akuza që lidhen me grup të strukturuar kriminal dhe armëmbajtje pa leje.
Sipas hetimeve, Kolaveri dyshohet se më 5 gusht 2020 ka bashkëpunuar me pjesëtarë të tjerë të grupit kriminal për vrasjen e Klevis Lleshit. Më tej, ai dyshohet se ka marrë pjesë edhe në transportimin dhe varrosjen e trupit të viktimës në fshatin Shpërdhet të Mamurrasit, me qëllim fshehjen e ngjarjes.
Pas mbërritjes në Shqipëri, 44-vjeçari iu dorëzua autoriteteve përkatëse për vijimin e procedurave ligjore.
