Gjykata e Posaçme vendosi të mos lejojë transmetimin live të procesit penal ndaj Ilir Metës dhe ish-bashkëshortes së tij, Monika Kryemadhi.
Vendimi i Gjykatës
“Prania e kamerave nuk parashikohet në legjislacion. Proceset gjyqësore nuk mund të shndërrohen në spektakle apo show mediatike, por duhet të zhvillohen në mënyrë të qetë dhe të garantuar. Prania e kamerave ndikon në cilësinë e gjykimit dhe shqyrtimit gjyqësor.”
Gjykata rrëzoi kërkesën për transmetimin live të procesit, duke lejuar vetëm praninë e përfaqësuesve të mediave dhe duke ndaluar çdo lloj regjistrimi.
Në nisje të seancës, avokati i Metës paraqiti një kërkesë paraprake:
“Kam një kërkesë paraprake. Kam bërë një kërkesë një javë më parë përsa i përket kafazit të xhamtë. Ua kam dërguar ambasadave, Komitetit Shqiptar të Helsinkit, ndërkohë Avokatit të Popullit nuk ia kam bërë, sepse është kot.”
Në këtë moment ndërhyri gjykata, duke i tërhequr vëmendjen:
“Konventën Europiane ju e përdorni kur ju duhet.”
Më pas, Ilir Meta kërkoi rishikimin e vendimit për transmetimin live të procesit.
Ilir Meta: “Dua t’ju kërkoj ta shikoni edhe një herë çështjen e transmetimit. Ashtu sikurse ne kemi argumentet tona sa i takon Konventës Europiane për këtë çështje. Ne i jemi referuar shteteve ku media është e pavarur. Raporti i OSBE ODIHR tregon se media është 90% e varur dhe e kontrolluar nga qeveria. Nuk shoh asnjë arsye pse ky proces të mos jepet live.
Ju vërtet thoni që raportimin e marrim nga gazetarët e nderuar këtu, por përderisa media është e kontrolluar, populli nuk do të ketë mundësinë të shohë të vërtetën.
Këtë çështje nuk e kërkoj për veten time për shkak të funksioneve që kam mbajtur, por e kërkoj për të gjithë të pandehurit.
Edhe si President, edhe si Kryeministër ua kërkoj.
Përsa i përket çështjes së kafazit, nuk më intereson shumë, është në dorën tuaj. Por, në ndryshim nga avokati, unë nuk e kërkoj për veten time për shkak të funksioneve që kam mbajtur. Transmetimin e kërkoj për shkak të funksioneve që kam ushtruar, të dytën jo.”
