Një nga gazetat më të mëdha të sportit në Itali, “Gazzetta dello Sport”, i ka kushtuar një shkrim marrjes nën hetim të ish-futbollistit të kombëtares, Igli Tare, i cili deri para disa javësh mbante edhe postin e drejtorit sportiv të klubit të Milanit në Itali.
Shkrimi i medias italiane:
Verë e trazuar për Igli Taren. Pas largimit nga Milani, për të mund të shfaqen edhe telashe gjyqësore në Shqipëri, vendi i tij i origjinës, ku ka përfunduar nën hetim.
Sipas burimeve pranë Prokurorisë së Posaçme shqiptare kundër Krimit të Organizuar dhe Korrupsionit (SPAK), ish-drejtori sportiv i Milanit dyshohet për “pastrim parash” në kuadër të hetimit ndaj ish-zëvendëskryeministres shqiptare, Belinda Balluku, e akuzuar fillimisht për “shkelje në procedurat e tenderëve”.
Sot, Prokuroria (SPAK) bëri të ditur se ka regjistruar Igli Taren në regjistrin e personave nën hetim edhe për veprën penale të “korrupsionit”.
Lidhja e dyshuar mes Igli Tares dhe Belinda Ballukut lidhet me një vilë në bregdetin Jon të Shqipërisë, brenda një kompleksi turistik.
Banesa dyshohet se i është ofruar ish-zëvendëskryeministres si ryshfet për një kontratë të dhënë një kompanie ndërtimi në kohën kur ajo drejtonte shoqërinë e kontrollit të trafikut ajror “Albcontrol”.
Për të humbur gjurmët e operacionit, vila është regjistruar në emër të Igli Tares, i cili, sipas hetuesve, dyshohet se ka nënshkruar “një kontratë fiktive qiraje me ish-shefen e kabinetit të Ballukut”.
Prokuroria pretendon se, de facto, banesa i përkiste ish-zëvendëskryeministres, e cila gjatë këtyre viteve dyshohet se e ka përdorur atë së bashku me familjen e saj.
Igli Tare iu nënshtrua një marrjeje në pyetje në Prokurori, nga e cila u largua pas rreth gjashtë orësh pa bërë asnjë deklaratë për gazetarët.
