Policia e Shtetit ka publikuar pamjet e ekstradimit të Florenc Çapjas nga Dubai drejt Shqipërisë. Ai u shoqërua nga forcat RENEA në aeroportin e Rinasit, nën masa të rrepta sigurie.
Florenc Çapja është një nga personazhet më të njohur të botës së krimit në vend. Emri i tij është përmendur nga i penduari i drejtësisë, Nuredin Dumani, i cili ka deklaruar se Çapja i kishte ofruar 200 mijë euro për të vrarë Sokol Sanxhaktarin, një person i njohur për policinë në Elbasan. Sanxhaktari dyshohej se kishte lidhje të ngushta me kundërshtarin e Çapjas, Suel Çelën.
Çapja është dënuar me burgim të përjetshëm për porositjen e vrasjes së Gentian dhe Nezir Beqirit në vitin 2012. Vrasja ndodhi në banesën e tyre, ndërsa Gentiani ishte në arrest shtëpie. Siç dyshohet, autorët përdorën një mik fëmijërie të viktimës, Etien Canin, për të hyrë në banesë. Ngjarja lidhet me një hakmarrje për vrasjen e Sokol Çapjas në vitin 2005, ku Gentian Beqiri dyshohej si i përfshirë.
