Katër nxënës të gjimnazit “Naim Frashëri” në Durrës kanë kaluar natën në ambientet e policisë në Kotorr të Malit të Zi, pasi bënë me duar simbolin e shqiponjës dykrenare. Të rinjtë, të cilët ndodheshin në një ekskursion shkollor, u ndaluan pas kallëzimit të një gruaje të moshuar malazeze, ndërsa këtë të diel dolën para gjykatës, e cila vendosi ndaj tyre masën e qortimit, përkatësisht një vërejtje me gojë.
Ngjarja ndodhi pasditen e 31 tetorit, rreth orës 17:30, kur nxënësit po ktheheshin nga dreka. Sipas raportimeve, një grua e moshuar i pyeti se nga vinin dhe ata iu përgjigjën duke bërë me duar simbolin e shqiponjës. Gruaja reagoi ndaj gjestit, ndërsa më pas njoftoi policinë, duke pretenduar se ishte kërcënuar nga të rinjtë.
Policia e Kotorrit i shoqëroi katër gjimnazistët dhe vendosi ndalimin e tyre për kundërvajtjen e pretenduar të nxitjes së urrejtjes kombëtare. Nxënësit qëndruan gjatë natës në polici, ku shkoi edhe një nga mësueset që i shoqëronte në ekskursion.
Mëngjesin e 1 nëntorit, katër të rinjtë u paraqitën para gjykatës kompetente në Mal të Zi. Procesi përfundoi me një qortim verbal, pa vendosjen e një mase më të rëndë ndëshkuese.
Sipas raportimeve, për incidentin ishin njoftuar që mbrëmjen e së shtunës Drejtoria Rajonale e Arsimit Parauniversitar në Durrës dhe Ministria e Arsimit.
Ndërkohë, deri në momentin e publikimit të këtij lajmi, nuk ka një reagim publik nga Ministria për Evropën dhe Punët e Jashtme e Shqipërisë për ndalimin dhe gjykimin e katër nxënësve shqiptarë në Mal të Zi. Nuk është bërë e ditur gjithashtu nëse autoritetet konsullore shqiptare kanë ndërhyrë apo kanë ofruar asistencë gjatë qëndrimit të tyre në polici.
Ngjarja ka përfunduar me qortimin e nxënësve nga gjykata malazeze, ndërsa mbeten për t’u sqaruar rrethanat e plota të incidentit dhe trajtimi i katër të rinjve gjatë ndalimit.
