Avokati i Popullit kërkon verifikimin e përdorimit të gazit lotsjellës dhe ujit me presion nga Policia e Shtetit gjatë protestës së 31 tetorit në Tiranë. Në deklaratën e publikuar sot, institucioni konfirmon se në polici u shoqëruan nëntë persona, katër prej të cilëve të mitur.
Sipas raportit të monitorimit, protesta përpara Ministrisë së Arsimit nisi rreth orës 12:00, ndërsa një orë më vonë pati përplasje mes protestuesve dhe policisë. Për shpërndarjen e tyre u përdor gaz lotsjellës dhe ujë me presion nga katër automjete policore.
Avokati i Popullit inspektoi komisariatet nr. 1, 3 dhe 4, duke konstatuar se gjashtë persona ishin shoqëruar në Komisariatin nr. 1 dhe tre në Komisariatin nr. 3. Katër të rriturit e shoqëruar në Komisariatin nr. 1 deklaruan se ishin kalimtarë dhe nuk kishin marrë pjesë në protestë.
Dy të mitur u intervistuan në prani të psikologut dhe përfaqësuesve të Agjencisë për Mbrojtjen e Fëmijëve. Në Komisariatin nr. 1 u konstatua sërish mungesa e sistemit audioviziv për regjistrimin e intervistave.
Avokati i Popullit kërkon verifikimin e ligjshmërisë, domosdoshmërisë dhe proporcionalitetit të forcës së përdorur, dokumentimin e arsyeve për çdo shoqërim dhe identifikimin e detyrueshëm të punonjësve të policisë përmes numrave në uniformë.
Institucioni u bën thirrje qytetarëve që pretendojnë se u janë shkelur të drejtat gjatë protestës ose shoqërimit në polici të paraqesin ankesa.
