Papa Leoni XIV ka pritur në një audiencë private në Vatikan ipeshkvijtë dhe administratorët dioqezanë të Shqipërisë, të cilët ndodhen në Romë në kuadër të vizitës zyrtare “Ad Limina Apostolorum”.
Takimi, i cili zgjati më shumë se një orë, u përqendrua në situatën e Kishës Katolike në Shqipëri, sfidat me të cilat përballet, si dhe zhvillimet e përgjithshme në vend.
Në emër të përfaqësuesve të Kishës Katolike shqiptare, Atin e Shenjtë e përshëndeti Imzot Gjergj Meta, ipeshkëv i Rrëshenit dhe president i Konferencës Ipeshkvnore të Shqipërisë.
Gjatë audiencës, ipeshkvijtë shqiptarë i dhuruan Papa Leonit XIV ikonën e Zojës së Këshillit të Mirë, e njohur si Pajtorja e Popullit Shqiptar, një vepër e realizuar nga një artist shqiptar.
Një tjetër dhuratë simbolike ishte libri kushtuar martirëve shqiptarë, i cili dokumenton historinë e persekutimit dhe qëndresës së Kishës Katolike gjatë periudhave të vështira në Shqipëri.
Përfaqësuesit e Kishës Katolike përsëritën gjithashtu ftesën që Papa Leoni XIV të zhvillojë një vizitë zyrtare në Shqipëri.
Vizita “Ad Limina Apostolorum” është një praktikë periodike e Kishës Katolike, e cila zhvillohet zakonisht çdo pesë vjet dhe u mundëson ipeshkvijve të takohen me Papën për ta informuar mbi gjendjen dhe veprimtarinë e Kishës në vendet që përfaqësojnë.
